دملګرو ملتونو پر دفتر د برید ترشا څه پراته دي ؟
ليکوال :حنان حبیبزی
په مزار شریف کې د ملګرو ملتونو کارکونکي د لاریون کونکو له خوا په داسې حال کې وژل کیږي چې ولسمشر حامد کرزي څو ورځې وړاندې دغه ښار د یوې داسې سیمې په توګه اعلان کړ چې امنیتي مسولیت به پکې کورنیو ځواکونو ته سپارل کیږي.په پرتلیز ډول ارام ښار کې چې ددغسې یوې خونړۍ پیښې تمه نه کیده ، بې له شکه يې دافغانستان نړیوال ملګري په ځانګړي ډول ملګرو ملتونو ته سخت ټکان ورکړی دی.
ظاهرا ، دغه لاریون د یو بنسټپاله مسیحي کشش د هغه چلند د غندلو لپاره وشو چې دمارچ په میاشت کې يې د متحدو ایالاتو د فلوریډا په ایالات کې د قران کریم یوه ګڼه وسوزوله او د نړۍ په ګوټ ګوټ کې يې د مسلمانانو احساسات ټپي کړل.
له هغې پیښې نژدې دوه اونۍ وروسته د مزارشریف په ښار کې دمسیحي کشش په ضد دغه لاریون د روضې د ملایانو په نوښت ترسره شوی چې پخپل ډول کې یو بیساری عمل دی.
د روضې ملایان چې پر انصاریانو شهرت لري ،په مزارشریف کې دحضرت علی رضي الله عنه روضه خپل جایداد بولي او ددوی لپاره یوه اقتصادي سرچینه ده.
دوی زیارت کونکو ته د روضې په اړه د مالوماتو د ورکړې سربیره هغوی ته د پیسو په بدل کې دم ، دعا او داسې ټوټې ورکوي چې وايی د روضې له هغه څادرڅخه يې جلا کړي چې پر قبر پروت دی.
دوی کوم سیاسي فکر نلري او له طالبانو څخه ددې لپاره کرکه لري چې د واکمنۍ پر مهال يې د حضرت علي رضي الله عنه په روضه کې د زیارت کولو پر یو شمیر دودونو بندیز لګولی وو.
طالبانو پر هغه څه هم سخت بندیز لګولی وو چې له انصاریانو څخه ددم او دعا اخیستل بلل کیږي او د نو روز میله هغسې نه لمانځل کیده چې د روضې ملایان يې تمه لري . د ډیرو زیارت کونکو نه ګډون ددې لامل ګرځیدلی وو چې انصاریان اقتصادي لاسته راوړنه ونلري او د سپیڅلو منجویرانو په توګه پر خلکو ځانونه هغسې ونشی تپلی چې دوی يې نیت لري.
خو اوس چې د فلوریډا د مسیحي کشش په ضد ، تش په نامه سوله ییز لاریون د روضې له جومات څخه راپورته شوی دی داسې پوښتنې له ځان سره لري چې باید وڅیړل شي. ولې یو سوله ییز لاریون پر تاوتریخوالي بدل شو او ولې د تاوتریخوالي ضد پولیس هلته نه وو؟
که هغو خبرونو او انځورونو ته چې له مزارشریف څخه رارسیدلي دي وګورو نو په زغرده څرګندیږي چې د ملګرو ملتونو پر دفتر د برید پر مهال هلته د تاوتریخوالي ضد پولیس نه لیدل کیږي په داسې حال کې چې د مزار شریف په ښار کې د تاوتریخوالي ضد پولیسو یوه مجهزه قطعه پرته ده او په تیرو ټولو لاریونونو کې يې شته والی څرګند وو.
یو عیني شاهد چې نه غواړي نوم يې واخیستل شي او د ملګرو ملتونو له دفتر سره نژدې ژوند کوي ، د ټلیفون له لارې راته وویل چې دملي امنیت کارکونکي چې په دغسې لاریونونو کې تل ځانونه څرګندوي ، د لاریون پر مهال نه لیدل کیدل.
د ملګروملتونو دفتر د مزار شریف په زړه کې یو داسې ځای کې دی چې د ملي امنیت د بیړني غبرګون د قطعې مرکز ترې یوازې دوه سوه میټره لیرې پروت دی. ویل کیږي چې ددغې قطعې په مرکز کې د لاریون پر مهال هیڅوک نه وو او که وو هم هیڅ يې غبرګون ونه ښوده.
په داسې حال کې چې خلک د لاریون لپاره د روضې د جومات د امام په بلنه راغونډ شول ،د بیړني غبرګون د قطعې غړو ته پکار وو چې د ملګرو ملتونو او نورو هغو بهرنیو خیریه ټولنو امنیت يې ساتلی وای چې ګومان کیده لاریون کونکي يې په وړاندې ټولیږي.
هغه لاریون کونکي چې ټپیان شوي دي د ملګرو ملتونو پر دفتر له برید او د بهرنیو کارکونکو له وژلو وروسته بیا د سیمه ییزو پولیسو په ډزو وژل شوي دي. یو عیني شاهد وویل چې له پیښې وروسته پولیس د ښار په بیلا بیلو څنډو کې راپیدا شول او دیخوا اخوايي ډزې کولې. څو تنه پولیس بیا د روضې جومات ته ورغلل او هلته يې پر یو زاړه سړي ډزې وکړې .
په مزارشریف کې خو د ملګرو ملتونو پخلاف د خلکو ترمنځ کوم بد نظر نه وو لیدل شوی او ددغې نړیوالې ټولنې کار د افغانستان په شمال او په ځانګړي ډول په مزار شریف کې تل ډیر ګټور او حیاتي بلل شوی . دا ددې لپاه چې ملګري ملتونه په افغانستان کې ثبات او ملکیتوب ته د ټولنې د بیولو لپاره هڅې کوي او افغانانو ته د کار په پیدا کولو او د هیواد د ودانولو لپاره مرسته کوي.
خو په ۲۰۰۴ کال کې د وحدت ډلې د وسله والو او د عطا محمد نور د ځواکونو ترمنځ د جګړې له کبله د ملګروملتونو د دفتر دوه افغان ساتونکي وژل شوي وو ، دغه پیښه هیڅکله د ملګروملتونو پر دفتر برید نه وو بلکې د تنظیمي تربګنۍ نتیجه وه.
ډېره ښه مقاله ده.. مننه
ReplyDeletehttp://nunn.asia